Enpresek bezero eta kontsumitzaileei egiten dieten deialdi berria da Crowdsourcing-a, ongi baitakite bezero eta kontsumitzaileen ekarpenak balio handikoak direla.  Bezeroa gero eta prestatuago dago, exijentea da, informatuta dago eta eskura dauzka komunikatzeko tresnak eta kanalak. Horrela bada, kolaboratzaile aktiboaren papera hartu du.

Zergatik ez dugu ziurtatzen produktu edo zerbitzu berritzaile baten arrakasta benetako protagonisten laguntzarekin? Bloke honetan aurkezten diren kasuek erakusten digute berrikuntzaren motor iraultzaileak ikaragarrizko indarra daukala ondo kudeatzen bada.

Enpresa batzuk denon ahotan dabiltza, beti doazelako lehiakideak baino urrats bat aurrerago, ordura arte inork ezagutzen ez zituen bideak irekiz.

Zein da beren inspirazio iturria? Batzuetan, barneko ezagutza libre uzten denean pizten da sormena, beste batzuetan, aldiz, kanpoko iturrietatik lortzen da; nolanahi ere, denok nahi dugu berrikuntza disruptibo bat sortu eta harekin arrakasta izatea. Coolhunter deiturikoek.

Zure enpresako berrikuntza prozesua enpresa barruan baino ez da garatzen? Kezkatuta zaude lehiakideek zure hurrengo ikerketa ildoen berri izan dezaketelako? Inoiz pentsatu al duzu zenbaterainoko ezagutza lor dezakezun enpresa kolaboratzaileen bidez? Horra hor antolakundeek beren buruari egin beharreko hainbat galdera, batik bat kontuan harturik merkatua abiada bizian mugitzen dela.

Modulu honetan aurkezten diren kasuek erakutsiko digute ikuspegi irekiagoa har daitekeela berrikuntzari dagokionean.

Jakin-mina, motibazioa, interesa, alerta-egoera… Antolakundeetako sail eta langile guztiek irekita egon behar dute ideia eta sentsazio berrietara, eta era berean prest egon behar dute den-dena zalantzan jartzeko. Zergatik ez? Horixe da goiburua.
 
Motibaziotik sortzen da interesa; interesetik ahalegina; ahaleginak ekimena dakar; ekimenak ideia berrien bilaketa, eta ideia horietako batzuetatik etor daiteke berrikuntza.  

Zirkulu birtuoso hori sortzeko, enpresetako zuzendariek erronka bat gainditu behar dute: giro motibatzailea sortu behar dute etengabe, ideia sortzaileak aurkitzeko eta komunikazio kanal egokiak ezartzeko. Horrela, bezeroek, hornitzaileek eta bestelako eragileek ere berrikuntza prozesuaren zati direla sentituko dute.

Zer sortzen da gizartea eta enpresa nahasten direnean? Nolako berrikuntza espazio berriak eskain ditzake nahasketa horrek? Nolako potentziala du elkarrizketa eremu horrek?
Gaur egun enpresak euren hormetatik ateratzen ari dira, eta gizarteak askoz ere modu dinamikoagoan hartzen dituen portaerak behatzen dituzte gero enpresan integratzeko.

Zein sinergia sor daitezke enpresako berrikuntza prozesuen eta gizarte berrikuntzako proiektuen artean? Saio honetan bildutako esperientziek erakusten dute hasiera batean pentsa daitekeen baino antzekotasun gehiago daudela bien artean.

Esparru bateko eta besteko berrikuntza kasurik onenak azaldu ondoren, adituek mahai-inguru batean eztabaidatuko dituzte gai hori eta beste hainbat.